Pti-lanp, pti-lanp, la kanpagn pou zéléksyon prézidan la répiblik i suiv son parkour. Sondaz i donn lo grin : toulé zour nana, inn, dé, troi... Iks lé dovan, igrèk lé déyèr, in pé nana bonpé voi, in pé la posh lé plate a pa savoir koman. In bonpé komantèr i pans Sarkozy lé dann malizé, d’ot i pans sé Hollande. In pé i ménas si la gosh i gagn, in kriz larzan i sa tonm dsi nou. Toutsala lé bien, toutsala i sèrv pou ranpli bann télé, bann radyo, bann zournal. Bann fézèr-défézèr l’avnir, zot mazinasyon na poin limite.

Moin pèrsonèl, si moin téi trouv in bon kandida, kapab diminyé lo shomaz, par égzanp diminyé d’moityé an sink z’ané. Sansa miltipliy par dis la kantité poisson bann rényoné i pèsh dann l’oséan. Sansa ankor kapab mète in plan séryé pou dévlop lo trin, partou dan La Rényon. Fé d’ot shoz ankor… Pétète galman diminyé par dé la mizèr, siprime lilétrism, goumant lo kantité lojman. Arzout ankor pèrmète kréol bien lèv la tète. Mi pé dir azot, moin nora vote pou li. Fransh vérité !

Mé, mon kamarad Zanbash la di amoin, Justin, ou i rèv ! Na poin pèrsone lé kapab fé sa. Lo moun i fé sa, dizon li fé mirak. Nana arienk inn téi fé mirak é pou romèrsyé ali, banna la kloute ali dsi la kroi. L’èr-la, pa bézoin kroir na in boug, l’ané 2012 i sava pran lo résponsabilité fé in mirak konmsa pars sak lé sir son poi lé o-fé. Avèk kisa ? Avèk bann gro vaza, i ranpli zot pla é i lèss arienk lo zo pou lé zot. Donk, si mi konpran bien, si lo mirak konm i di, i apèl dévlopman, bin sa in guèr sa alor ! Sa in lite ! Sa in gran batay po améné. Mé, i vo la pène, non ?

 Justin