I paré bann rényoné i yèm bien Thaïland, pou sak i gingn alé bate karé dann péi-la. In moun la di amoin li yèm tout la-ba : kisoi bann lotèl, kisoi bann tanpl boudist, kisoi bann marché, kisoi la mode, kisoi bann zorkidé é tutti-quanti… Mèm in pé la parl amoin bann masaz thaïlandéi ral azot bien, konm la boks thaï.

An touléka, i paré son kapital sé in bèl bébète la vil : dis milyonn moun i antass laba kisoi dann grat-syèl, kisoi dann ti-kaz, kisoi dan la kaz normal. Mé néna désèrtin zafèr ou i aprann mèm a distans, mèm kan ou i pran pa l’aviyon pou alé dann vil la : in vil obèz dsi in éskélète ti marmaye konm bann savan lo péi i di sa par zot mèm. Kosa i vé dir sa ozis ?

Sa i vé dir lo vil lété bati dsi in bann ban lo sab, in mète sinkant otèr, é konm la fé in takon gratsyèl si tèlman lour é konm la tir d’lo dann bann galri ébin la vil i dsann. Pa in bonpé : zis inn-dé santimète shak ané, mé fors a fors lo vil i koul. Dizon mèm si èl lé bien armé pou défann aèl avèk 2600 kilomète kanal do lo, avèk sak i fo pou tir d’lo otan k’i pé, lo vil konm moin la mark an-o la lé ménasé toulbon.

L’ané 2010 gouvèrnman la fé in plan pou ésèye sov son kapital mé kan l’ané 2014 l’armé la fé in kou d’éta, lo bann shantyé l’arété pars biensir la di sa i kout tro shèr si tèlman la vil la arkomans désann. Tazantan ziska 40 % la vil lé inondé sirtou bann kartyé popilèr, la pa bann kartyé rish. Zordi gouvèrnman i pans v’ariv sov moityé d’la vil. Sa i vé dir in moityé va pran l’fon dan in ka konmsa mi sipoz sa sé pa in kékshoz i konsol bann demoun Bangkok.

Troi séktanm la ouvèr dann Bangkok lo kap 24, apré sète la spass Paris épi sak la spass dann Marok. Mi koné pa kosa i sava di laba. Mi koné pa si d’moun va oir la vi an roz aprésa, mé mi dout pars la pa lo sèl vil lé ménasé, néna in bonpé d’ot ankor é l’moun alor ? Réfijyé klimatik i atann azot pa plis, pa moins.