Pou kossa ?

Pé s’fèr pars si wi grate in pé la po « noute viv ansanb » -toutsuite i tonb dsi boubou la kolèr .I diré Lo rényoné, nou par l’fète, sé d’ moune an kolèr.Pou kèl rézon ? Pars aforstan la zoué avèk nout léspoir, sète-la la kass par boute é pa arienk zordi, mé dopi kék é kèk zané.. Kissoi nou l’ atande promèss pèrsone la pa fé avèk nou, kissoi la fé anou promèss é la pa tienbo parol-la pa zamé tienbo parol..

Alor mézami, mi panss la pa nésséssèr kass la tète pou invant in fète popilèr pars lo rényoné konm d’ote moune i koné fè la fète si zot la anvi fé la fète, mé i fé pa la fète sir komande é anplisské sa li pé pa fé la fète toulézour..Si in zour zot néna dann zot min kalandriyé zot komine épi kalandriyé bande komine dann l’arondisman zot va oir lokazyon fé la fète i manke pa é la plipar d’tan sa i kol pa avèk zot lanvi azot pou fé la fète.

Alor aprésa in pé v’alé oir dann zoinal lo bande top épi lo bande flope. Zot i pé fé sa si zot i vé mé assiréman avan l’ané i komanss zot i pé déza par zot mèm prévoir kossa va fé top épi kossa la fé flop . Néna dé zour i sone konm in zour d’fète dann la tète demoune, mé d’ote zour i sone pa ditou konm in zour d’fète .

Mézami in gran boute ma vi mwin l’atande in gran fète-sète lo zour nou va gingn lotonomi-mé zour d’fète la la pa arivé.Zordi mi atande lo zour lotonomi alimantèr, lotonomi dann l’énèzi, épi d’ote ankor san konté la grande fète dsu la finission la mizèr dann noute péi , épi l’antante rante bane péi loséan indien.

Mi koné pa si m’a oir ali, mé lidé ké li pé arivé, i ède amwin garde lékilib pou marshé, é pou lité...

A bon ékoutèr, salu.