Moin la touzour maziné shakinn rant nou nana son parkour pou fé dsi la tèr é ni doi fé so parkour-la. Mi kalkil mèm si nou la pa gingn fini nout parkour nana in n’ot kékpar pou ropran lo baton l’androi nou la lès ali. Sé pou sa, solon moin, mèm si la mor lé pa in n’afèr zoiyé, i fo prann aèl konm sak èl i lé, konm in parkour la pankor anshévé, sirtou bann parkour gravé dann l’istoir-inskri dann l’istoir si zot i vé.

Moin la pans sa kan nou l’été dann la véyé pou Paul Vergès é moin lé kontan kan mon bann dalon i di i fo kontinyé lo travaye sak so zéan-la, la komansé épi lété dann l’obligasyon pou arété. An pliské sa moin lé ankor pli désidé kan mi rogard l’istoir mon péi-dé zour par raport l’istoir l’imanité ! Troi san sinkant z’ané ? Sa la pa bokou dsi pétète lo san sinkant mil z’ané listoir l’om modèrn dési la tèr ! Troi san sinkant z’ané in bann prozé koup-koupé avan ariv in bon rézilta.

La aboli dé foi l’ésklavaz l’ané 1794, épi l’ané 1848 ! La sèy aboli lo kolonyalis inn-dé foi épi zordi son frèr lo néo - san gingn ariv o bout réèlman mé lo flanbo, si li la tonbé, la flam do fé la pa tinn, é nana d’ot min pou trap ali é pou amenn ali pli loin.

Moin té pèrdi dann mon réfléksyon. Dann mon délir pétète ! Kan moin la aprann dann radyo frans-intèr Fidel Castro lé désédé : in gran zéan la parti. Mon volan la près shap dann mon min ! Mé moin la kalkil an moin mèm nana lontan bann barboudos l’avé rant dann La Havane-lo kapital Kiba - an vinkèr é lo travaye fé lé pliské inportan pou l’istoir kansréti dsi la késtyonn la souvrènté nasyonal.

In konba la komans nana bonpé d’tan kont bann kolonyalis éspagnol, épi kont l’inpèryalism amérikin é mèm si konba-la la bien avansé li la pankor ranport in viktoir définitif pars lo z’énmi la pankor rann lé z’arm. José Marty-in poèt mor lé z’arm dan la min - té i di pa : « Moin la viv dann kèr lo monstré, mi koné son z’antraye mé mon flèsh lé konm sète David ! »

Si Fidèl la ropran lo flanbo dan la min josé Marti laté blijé abandoné. Nana d’ot moun pou ropran flanbo-la dann la min Fidèl. In gran jéan la parti mé lo mond lé kant mèm pa san famiy.