Zistoman o pyé d’lo mir… Figuir azot laba Maurice, dann in gran désharz i apèl Mare-chikoz néna in gran fé la pran dann bann déshé avèk toute sak in fé d’déshé épi son drol fasson progréssé. I paré dofé la pran dsi 42000 mète karé é i étinde par-la sink san mète karé par zour. Sé dir si nou lé pa paré pou oir la fin. Linssandi-la é kan sar fini nou lé a d’mandé dann kèl léta sar lo gran sirfass brilé-i di mèm lé riskab d’ète in katastrof ékolozik.

Néna dë soir d’sa, mwin la ékoute in konféranss bann résponsab la doné épi la télé (lo MBC) la fé lo kontrandi. Dann la konféranss mwin la konm antandi lo gouvèrnman la kriye o sékour avèk gouvèrnman franssé é d’apré sak téi di zot téi atann in bon nouvèl, an partikilyé par rapor lo Dash. Bone nouvèl ? Pa si tan tèlman pars sé pa nou k’i fé la loi issi sé léta lokal, donk lo préfé avèk son bann an rolassyon avèk lo gouvèrnman.

Paré-t-il ; an kontrèr d’sak lo gouvèrnman lil sèr téi di, na poin promèss de noute koté, mèm gouvèrnman la réponn par non… Pars sé gouvèrnman k’i konte pars nou késtyonn pouvoir ni fé sak ni pé mé ni pé pé-konm mon proféssèr langlé téi di an parlan d’mwin… Sèl zafèr la fé sé in léta ùmajor éstratéjik bazé issi dann La préféktir… Si ni rotourn in pé an aryèr mi rapèl kan l’avé di i sava anvoye in dash inn parti l’ané shé nou. Mi rapèl mèm in pé l’avé di i vo myé ni ashète in dash konmsa sa va ansèrv anou, sa va ansèrv ossi noute bann voizin tazantan, mé léta-lokal é son gouvèrnman i prétan pa done anou lo moiyin pou nou fé in politik solidarité avèk noute bann voizin par noiu mèm.

Wala ankor in kou, noute voizine lé dann in gran difikilté é nou lé abssan késtyonn solidarité. I fo dir èl ossi son koté èl lé pa tro solidèr par rapor a nou, à bann péi komor, épi d’ote… Ni antan mèm pa in zèss solidarité é apré nou v anaparl fère avèk sèr. Mi diré paf o-frèr é fo-sèr mé lé pa bien loinn dsa.

A bon antandèr salu !

Justin