Pé sfèr zot i di amwin, mi marke sa pars lo 12 novanm té lo zour anivèrssèr lo déssé noute kamarade Paul Vergès-in gran pou vréman sète-la.Biensir li l’amenn la politik dann in pti péi, mé li la pa kontante ali avèk sa pars obliye pa li té internassyonalist é mèm mondyalist si ni agarde in pé son travaye dsu lo réshofman klimatik.

Zot i panss mon kozman i konsèrn ali mé pou mwin la pa vré. Pou kossa ? Pars in kontakt avèk Paul lété lokazyon aprann dé shoz. In lintervanssyon dovan lo komité santral é lété lokazyon profite son lékspèryans.. Alor mézami zot la konpri mon kozman i konssèrn pa noute kamarade san pour san,pars mi koné pa si néna in moune – in n’ote ke li-la pran si tèlman son tan pou form son bande konpatriyote é mèm pli loin ké sa.

Li té pa avar son konéssanss ni égoïste par raporte son lékspèryanss.Toultan Paul téi ésplik é téi pass son tan pou éspliké.Si ou la travaye in pé koté li, lé sir é sèrtin ké ou la ramenn kékshoze ou la tire dann son grande kiltir politik. Donk si lé vré, dann la natir, bande gran pyé d’boi i anpèsh zèrb poussé, dann in parti lo gran militan sé sak i nyabou form son bande dalon, é mète azot an sityassion pou grandi zot tour.

A bon ékoutèr, salu !