Oté

In gran pyé d’boi i anpèsh zèrb poussé

In kozman pou la rout

Justin / 15 octob 2020

JPEG - 43.6 ko

Médam zé Mésyé, la sosyété, mi pans moin la fine anparl azot kozman moin la mark an-o la. Pou kosa mi di sa zordi ankor in kou ? Sinploman pars lédikasyon marmaye i fonksyone avèk la répétisyon bann amontraj épi bann prinsip l’amontraz. Mi pans galman dopi moin la anparl sa, néna d’ot gran pyé d’boi la fine pousé épi zot osi la anpèsh bann zèrb profite solèye pou grandi. Mé par l’fète kosa moin l’apré di moin-la ? Konm prétèks néna pyé d’boi épi zèrb mé dann in poinnvizé sosyal, ni parl pi zèrb épi gran pyé d’boi la ! La ni parl la sosyété épi bann gran pèrsonaz épi bann ti kolon. Bann gran pèrsonaz i profite lo méyèr dann la sosyété é bann ti-kolon i kontant azot avèk lo réstan. Mé i pé z’ète otroman ? In gran profésèr, i pé, si li vé, bien form son zélèv pou k’in zour i trap ali, é mèm i dépass ali. In gran profésèr i ve pa son zélèv i galiz avèk li sé iin mové profésèr, in profitèr é pa pliské sa, in linkapab amontré. Alé ! Mi kite azot rofléshi la dsi é sirtou mi souète bann gran pèrsonaz i gingn grandi zot disipl é i évite légoïsité épi l’anprofitaz. Ni artrouv pli d’van. Sipétadyé.