Akoz zot i vé toultan dir anou kossa ni doi kroir, kossa ni doi pansé ? Akoz zot i shoizi pou nou sak lé bon épi sak lé pa bon ? Akoz zot i done inn in brové lintélizans, l’ot zot i mète dann tiroir la bétiz ?
Rant la Chine épi Le Tibet, zot i di anou zot i koné kissa na tor épi kissa na rézon. Poitan, mi pans pa zot la parti rèss la-ba in bon koup de tan ! Moin la pa antandi dir zot la ékri in liv savan déssi so késtion-la ! Zot lé sinolog sansa tibétolog, sansa ankor savan dann la roklizion Bouddha...?
Rant La Russie épi la Georgie, zot i di zot i koné kissa sé lo diab, kissa sélo bon dié. Poitan moin la pa antandi dir zot la parti bate in gran karé la-ba, épi zot la pass partou pou rann azot kont par zot mèm kissa na rézon, kissa na tor.
Moin la zamé antann dir, zot la konpar sak in pé i mazine, avèk sak d’ot i kalkil an parmi bann gran roportèr, bann zékspèr, bann savan, bann moun bien-bien kulturé. Mé pétète zot la pa bézoin fé tousa ? Pétète na dmoun i réfléshi pou zot ? I mash, i mash, i rèss azot arienk pou anvalé ? Somanké, na in pé i ékri la vérité pou zot lir ?
Pardon, éskiz ! Moin la oublié zot lé zournalist épi zot lé péyé pou lir sak zot i apèl la vérité. Epi kan ou nana in gran shèk, ou nana in gran kapasité, in gro moné i fé lo moun gabié ! Fransh vérité !

Justin