Demoun i di konmsa, dé foi, in pti désizion i amène gran-gran konsékans. I di mèm, si in papiyon i bate la zèl, dann in gafourn par-la, sa nana konsékans dann d’ot kartié déssi la tèr.
Na poin lontan, kan le Prézidan La Frans, la di li sava anvoy solda an plis dann l’Afghanistan moin la pa tandi bèl-bèl dézord. Moin lé sir, in pé la di k’sé son n’afèr vik li lé lo shèf l’armé fransèz. Épi, péi-la lé si tèlman loin, ni koné si tèlman pa li, kouék sa i pé fé anou. Nou lé pa la èk sa !
Nou la pa tro sousié lo rézon li nana pou anvoy solda la-ba an plis. In pé i prétan, nout prézidan i vé défash avèk bann zamérikin donkalor, li fé in jèss.. Konm sa pétète gouvèrnman amérikin va défash avèk li épi va tash moiyin fé inn-dé gro kontra pou kontant bann gro vaza. Sa sé sak in pé i di !
Mé sak lé sir sé k’la Frans i sava fé romark ali, i sava bate déssi léstoma dann péi-la, i sava amontr koman li lé bon... Kossa i ariv ? Lo lènmi i di mi sar montr ou kèl koté brinjèl i sharj ,épi oplis m’a fé kékshoz éspéktakilèr sé oplis demoun la frans va gingn la krintiv épi sar kont lo gouvèrnman.
Épi, i ariv sak l’arivé ! Épi in jène kréol, an parmi dis dalon, i gingn la mor la-ba ! Dann péi déor, dann l’Afghanistan.

Justin