Kissa i lé toussa dmoun-la, assiz dann ban konm bann marmay lékol ? Na in bon pé, in ! Sa in bann z’amontrèr i sort déor. Sa lé instruyé vèy pa ! Zot nana tout z’ot diplonm !
A bon ! Lé valab alor !... A oui ! Lé valab pou vréman, sof zot i koz pa la lang matèrnèl bann marmay La Rénion... Bin, koman zot i sava fé, vik a s’ki prétan, solon zot shèf, marmay issi i gingn pa koz fransé..déssèrtin i koz fransé an masikrok. Bin, alor ! Koman i roganiz in kominikassion dann in nafèr konmsa ? Bin, la ! I fé konm k’i gingn..Pétète, i gingn ar pa ! Mé z’ot shèf la di azot, la pa bézoin alé aprann kréol La Rénion pou fé in bon lansègnman.
Alor zot i koz an lang, konm bann zapote Zézikri ? A non ! Na lontan ségré-la la fine pèrd !
Bin issi, na dmoun instruyé, i arète dsi l’bor shemin ! Épi, zot i koz kréol ! Alor, akoz i pran pa zot konm amontrèr ? I di zot la poin diplonm amontrèr ! Alor, govèrnman i vé pa dzot ! Bin pétète narté mié pou bann marmay ? La pa lansègnman i doi adapt bann marmay, sé bann marmay i doi adapt lansègnman !
Issi sé sa la loi. La loi bann gro vaza i sort déor épi la loi in pé d’moun issi, léspri lé anklavé ! Ala pou kossa, gouvèrnman, la trouv lo tik-tak : in kalité lémigrassion shoizi. For, for !

Justin