Dann péi Haïti, i arète pa fé lo kont demoun lé mor dann tranblemann tèr. I sorte di, i fo konte par-la san-sinkante mil. I fé bokou pou in péi lé pa si tan tèlman gran (in pé plis dis foi la Rényon). Byinsir, dann in ka konmsa, lo kèr d’moun i fé mal é bonpé i déside donn in kékshoz. Bann z’asosyasyon, lé kalifyé la-dan, i vyin sir plas pou édé. Solman, souvan dé foi, le l’ède i pran lo tan pou arivé, é l’moun sak la bézoin pou vréman, sas-pé ké zot i deboute-guète é zot i oi pa aryin arivé.
Poitan, bann sékourèr té i an mank pa... mèm k’i prétan dir, dis mil solda l’Amérik l’ariv avan k’lo z’afèr la éspassé, sansa zis in pé apré. In pé i apèl sa l’invazyon imanitèr. Pou konbyinn tan zot lé la ? Difisil pou savoir, mé solon Hilary Clinton, sokrétèr d’Éta, zot lé la pou in bon koup de tan. Byinsir, promyé minis lo péi Haïti, méssyé Jean-Max Bellerive, i di sé son gouvèrnman k’i vé roganiz la rokonstriksyon avèk l’ède lé z’ot péi. I di ali oui-oui, i bate déssi son do, mé i di l’Éta lé dékapité é bann z’Amérikin i koz pa tro : zot i kontrol térin l’aviyon, zot solda lé in pé partou, zot lélékoptèr i poz dan la kour lo palé prézidansyèl, mèm in pé dégréné, mé sof !
Épi i antan in pé drol nouvèl. Sréti pa bann z’Amérikin zot mèm ké noré provok lo tranblémann tèr avèk lé z’arm sismik ? Konm zot la provok d’ote dann Vénézuéla. Sa lété pa in tèst pou oir si i gingn pa mète l’Iran a-tèr san fé la guèr pou vréman ? In pé di ossi, tansyon pangar, bann z’Amérikin la bézoin bann baz pou son l’armé dann l’androi pars li la poin aryink in bann z’ami tèr-la : nana Vénézuéla, Nicaragua, Cuba, La Bolivie, Brésil... i komans fatigué avèk zot manyèr komandèr. Alors, tranblémann tèr dann Haïti, in katastrof, lé pliské vré pou vréman... mé in katastrof, pétète, k’i tonmré byin pou déssèrtin ?

 Justin