Méssyé Didier la parti oir bann minis pou dir i fo prann in l’arété dé katastrof natirel par rapor nana la séshrèss La Rényon ; Bann z’élvèr i an mank delo, épi i an mank fouraj pou zot z’animo ; Bourjon kann lé riskab krévé épi la koup i pé z’ète mové. Demoun i an plègn pars na poin delo konm k’i fodré dann robiné. Tousa-la lé vré. Lé vré ossi la plui la pa tonm konm tou lé z’an ;

Mé kan la tonbé, la pa fé arien pou ramassé. Arien k’an ramassan, noré do koi pou kontant in bonpé d’moun. La pa fé arienk pou sa ! La-ba Sint-Roz nana delo i koul dan la mèr soir-o-matin, matin-o-soir. I di nana disète mèt-kib delo i pèrde konmsa dan la mèr par èr d’tan, donkalor plis troi san mète-kib dann vinn-katrèr. Zot i koné kossa l’ariv dann baskilman ? La fé pète in nape delo é le lo la koul dann vide pandan sé pa konbienn tan. I di ossi, na par-la karant-sink pour san delo potab i pèrde an rézon k’bann tiyo lé mal fouti ;

La pa tou sa, vik té i doi fé bann rotoni-kolinèr la Plène dé Kaf, é la pa fé… touléka lo problèm lé bien an rotar. Té i doi kapt bann sours, é la pa fé. I fo ète séryé lé ga, apèl in shat in shat, é la néglizans imène la néglizans imène. Donk, domann in l’arété katastrof natirèl, oui ! Pars pou in katastrof, sé inn ! Mé lé pa si tan tèlman natirèl ké sa !

Justin