Mé zami, La Rényon i sort ranplas in bonpé lo mèr dann bann komine dé foi gran, dé foi pti. Par l’fète dé sèrtin kominoté d’komine la ranplas galman zot prézidan épi zot désidèr politik. Nou la pa mète tout an nèv, nou la gard in pé bann zansien. Léspèryans bann zansien avèk lo kouraz épi lénèrzi bann nouvo alala in bon n’afèr. In bon miks konm k’i diré ! La Rényon i sava fé in nouvo dépar, dann bon sans, é dan la nouvoté. Hmmm ! La nouvoté ? Alor sète-la fé pa prann amoin po d’shanm pou pla kouvèr, makaroni pou la bouzi, konm in pé téi di sa dann tan lontan. Mé oui, mé zami, zot la bien konpri, mi dout.

Pou koué mi doute ?

Par raport lo mank di motif di pourkoi : lo nèrf la guèr, la moné, larzan si zot i vé. Akoz sa i mankré ? Sinploman pars dopi Sarkozy, an passan par Holland, ziska Macron nou la sibi bann razèr d’pint. La raz la pint dann lopital. La raz la pint dannn bann koléktivité, dann bann komine, la raz apint dann dévlopman, dann la kiltir, épi dann la défans la natir. Arzout ankor avèk sa lo bann kouyonad ké désèrtin koléktivité la fé par zot mèm : la védète ladan pou konsèye réjyonal épi son prézidan mé li lé pa tousèl ladan é dann radyo, sansa dann télé ni aprann tou lé zour, néna in pé i doi éponn pou zot tirpitid dovann tribinal.

Mé la pa solman sa. Pou koué ? Pars si fitintan kan Paul Vergès la fé lo sivomr, la fé pass lintéré zénéral avan lo bann zintéré partikilyé é si la propoz in sollidariré rant bann koléktivité, a pène Paul Vèrgès té fine dévir lo do bann komine la vouli konsèye zénéral i zoué zot prop rol, zot la vouli osi konsèye réjyonal i ède azot fér fass zot dovoir. Pli pir bann konpagni lavyon zot osi la kriy sokour, mèm bann partikily é la vouli pass zot vakans konm ma mèr téi di o fré d’la prinsèss. Parl pi bann lanbosh par konplézans, l’anploi inzistifyé… Mé la pa tousa, si lo sistèm lété pa obout son roulo li noré pa donn lo mové rézilta li l’apré doné : in kaz i komans pouri, siklone i fé dé ga dsi li. Fransh vérité !