Mwin lé sirésèrtin l’avé dsu la route in tralé bus téi amenn demoune an piknik, sansa an ropa-partaz in pé partou La rényon… Arivé Sin-lé lo résponsab la parl bande magazin an pyèr d’taye in sèrtin tan téi sèrv pou éstoke bande bal kafé avan lésportassion… Mi di sa pars an parmi l’moune téi ékoute l’avé inn kan la di téi éstoke bande bal kafé, la pouss in kri létoneman, pars sak mwin lé sir sé ké pèrsone-la l’avé zamé antande parl la pèryode kafé dann nout listoir l é sa néna poin arien pou étone anou, pars dann tan téi anparl prèss pa listoir nout péi.

Si ni parl dosèl é si ni manz dosèl inporté, boudikonte, sé l’èr i fo ni kalkil ossi oussa i sorte kafé ni boir ! Ébin i sorte pa La Rényon pou la mazorité, mèm si kafé i pouss é i sharj trébien. Ni gingn fé mé ni fé pa, ni profèr — non ni profèr pa sa sé konm in l’obligassion pou nou — si ni vé boir kafé i fo ni ashté. An fin d’kote lé vré pou katrovindiss pour san bande produi ni konsome kissoi sak ni manz, kissoi sak ni boir, kissoi sak ni soign anou avèk, kissoi mèm flèr ni mète dann nout salon.

Mé antanssyon sak i anpèsh anou produi sak nou la bézoin dann noute péi néna la bone ésplikassion k’i fo pou nou… é konbienfoi nou la antande sa alé oir sa lété pa prouvé ditou, sa lété pa sirésèrtin, é lésplikassion téi vo son poi la taye lo shate… Pou d’ri, i di néna poin assé d’lo pou plante sa poitan lo ri la pa in plante akwatik épi néna d’ri i pé plan te kon m i plante mayi an kiltir sèk. Pou d’sèl i gingn sa méyèr marshé ayèr-ayèr sé an érope é parl pa mwin d’méyèr marshé laba dann lérop .. Mi rapèl in tan téi di bande vash la Rényon i pé pa done dolé, pars lo zèrb lété pa bon pou lo laktassion. Mayi, i plante pi, pars sa i raporte pa.

Akoz pa monte in bétizyé dsu sak lé possib é sak lé pa possib é in zour mwin lé sir nou va antande dir : kann i pouss pa La Rényon. Mèm lagrikiltir lé inpossib sa shé nou. La prèv ké lé possib tyé kouyon pou pran son plass.

A bon ékoutèr, salu !

Justin