Poitan mwin la antande souvan dé foi demoune apré di dann tan la guèr trante nèf-karantsink téi fabrik dosèl issi dann noute péi. I parétré dann tan la guèr dosèl lété rassyoné é déssèrtin moune téi sorte dan lé o Sin-Lé avèk in marmite é zot téi mète zot marmite o fé avèk lo d’mèr dodan épi kan l’avé pi d’lo, ébin l’avé d’sèl. Pa in gran pureté d’sèl, pa in gran kantité, mé assé pou kui lo mayi épi si la shans i voulé fèr zot kari poisson.

Mé l’avé d’ote métod pou fé d’sèl : i fo dolo d’mèr , i fo solèye é dann plizyèr zandroi téi fé sa fassilman , La Possession, Sin-Pol, Sin-Lé, Sin-Pyèr épi d’ote zandroi ankor. Dann bande zandroi-la l’avé bande saline é zistoman la saline té in l’androi té i fé d’sèl.

Noute déstin anou lé pa in dèstin normal é mi poz azot la késtyon : akoz i pé fé d’sèl Maurice, akoz i pé fé sa dann bande zil Komor, dann Madégaskar, l’Afrik é issi i gingn pa. Mi domande amwin si par azar lo d’mèr La Rényon l’arète d’ète salé alé oir li la kontinyé dann nout l’anvironeman. Zot i oi bien mon késtyon lé absurde, é bien antandi mi koné pa pou kossa koméla na pi in sèl landroi pou fé d’sèl issi shé nou.

Mézami poz in késtyon konmsa sé konm si ni domande pou kossa noute péi lé pa dévlopé ?

A bon ékoutèr, salu !

Justin