Promyé romark avan mi komans mon kozman : mi konfonn pa promosyon avèk piston. Promosyon pou moin sé kan ou i gingn in post travaye i korésponn avèk out kapasité. Piston sé kan i donn aou in post travaye na rien a oir avèk out kapasité. Ni vé bien la promosyon bann rényoné, é pa in sistèm piston – piston sré plito pou sak i ariv isi l’èr anfariné. Anfin d’apré moin !

Donk si ni vé in vré promosyon bann rényoné-rényonèz, i fo in sistèm formasyon i donn la kapasité pou fé désèrtin métyé, é an plis la kapasité pou pass lo bann konkour k’i fo pasé. L’avé in volonté politik, l’avé poin ? Alon pa obliy ziska bann zané Soisant-dis l’avé arien dë lisé dann tout La Rényon. L’avé galman in l’inivèrsité kroipyon é si ni parl CHU, si ni parl formasyon bann zinzényèr, si ni parl ankor bann prépa, sa i komans égzisté mé lété long pou démaré siouplé.

In souvnir i vien dann mon tète : kan Paul Vergès l’avé domann rouv in CHU isi La Rényon in pé la di sa in gaspiyaz vi ké néna an Frans é sak i vé na ka alé laba - dopi la nyabou fé mé pa san kou d’frin - Mi rapèl ankor d’ot tré konmsa é sa téi vien pa solman dan la boush bann moun déor, téi vien osi dann la boush demoun d’isi-i diré mi antann virapoullé apré lans son bann zinbésilité… Si ni kalkil mèm ni pé poz anou la késtyon la MCUR : kisa la priv bann rényoné épi bann moun loséan indien in zoutiy formasyon é rouvèrtir d’éspri konmsa ? La pa bann kominis an touléka.

Kisa l’otèr si zordi apré soisant-dizan départman fransé é in popilasyon près in milyonn moun, nou lé ankor an rotar konmsa pou la formasyon nout bann zélite - alé oir isi néna la plas pou form nout bann zélité épi bann zélite l’indyanoséanie !- é kan bann zélite lé formé, kisa l’otèr si i égzis in sistèm étidyé pou ékart bann jenn rényoné par raport in bann post inportan. Mé mi pans i fo ni rovien dsi in n’afèr konmsa é pa arienk in foi pars lé sir nou lé pa dann in sistèm promosyon pou rényoné-rényonèz mé dann in vré apèl d’èr pou sak i sort déor..

Astèr mi fé in romark : kisa la domann in moratoir pou donn travaye kréol sir plas dann bann sèrvis piblik ? La pa gouvèrnman gosh konm droit, la pa non pli son bann konplis si mi tronp pa !