Mézami, mon bande dalon, zot i koné néna in n’afèr i tourn an boukl dann mon tète é mi poze amwin toultan lo mèm kalité késtyon. Ala mon késtyon :

Si lé vré ké dann noute natir é pliss lontan ké koméla, l’avé-é néna – toute sak i fo pou soign anou, pou kossa dann l’apré-guèrr demoune téi mor konm moush issi La Rényon : kissoi rofroidissman, kissoi suite de koush, kissoi lo vèr, kissoi ankor mal do vante, tanbav karo épi toute bande zantyèss la natir téi akabl anou avèk ?

Mwin lé sirésèrtin in pé va dir amwin, sa la pa vré, sé lo pouvoir kolonyal i fatig mon tète, i alyène amwin é i fé prande amwin blan pou noir. In pé va raprosh amwin pa fé konfyanss lo jéni noute pèp, mé plito gob konm zèf kru toute sorte kalité la mantri lo pouvoir kolonyal i fane pou bande gogo konm mwin..épi konm d’ote.

Na dé-troi zour, in bon kamarade té apré di amwin : oute manzé lé dovan ou é wi manze pa pars ou lé okipé suiv la konsomassion kolonyal épi néo kolonyal. Li la di amwin ossi, oute médikaman lé dovan ou é wi songn pa ou avèk pars oute léspri lé troublé par la panssé kolonyal épi néo kolonyal.

Mi di pa li na tor, mi diré mèm li na rézon, mé kossa k’i fé ké mon manzé lé dovan mwin é mi manze pa, mon médikaman lé dovan mwin é mi songn pa mwin avèk ?

Mézami, mon bande dalon, lo bande késtyon mi poze, mi panns sa in bande vré késtyon, mé la pwin bande bon épi bande vré réponss.i néna inn sé l’alyénassion, mé kossa k’i fé ké, momandoné, nou té alyéné konmsa ? In kèstyon i ramène in késton, mé pa pou mwin in réponss i kontante amwin.