Mé zami, mé kamarad, i pass pa dé vikend san ké in pé i san zot kor épi i déklar zot lé paré pou z’ète mèr. Zot i pans sé zot lo méyèr, sé zot lo pli bon é nou va oir, nou va oir, sak nou va oir. In zéléksyonn mèr isi épi koméla la pa in n’afèr ordinèr, sé in n’afèr inportan é mèm pliské sa.
Pou kosa ? Pars lo péi lé kom li lé é sirman li é pa dann in bon sityasion. Pars lo mond lé konm li lé é sirman li lé pa dann in bon sityasion. Pars loséan indien lé konm li lé é li lé pa dann in sityasion anvyab. Mi sa pa dékline azot sa dann détaye mé d’apré sak mi oi bann zéléksyonn mèr, zordi, dann lo tan k’i kour, sé in n’afèr k’i plézant pa avèk.

Ni pé prann in sèl légzanp : lo réshofman klimatik. L’èrla moin la suiv in pé bann déklaran d’kandidatir é mi domann banna, nouvo konm zansien : kosa zot i prétan fèr pou prépar nout péi-zot komine si zot i vé - par raport lo réshofman klimatik. Si zot i di amoin arien pars sa i rogard pa lo mèr épi son konsèye minisipal, l’èrla mi profèr dir azot fé ot shoz pars ni vé ni vé pa, lo réshofman klimatik sa kékshoz lé inportan é plisk’inportan pou nou, grav é pliké grav : pou nout péi, pou nout v oizin é pou l’avni r d’la tèr.
Donk, pou mon par, mi domann bann kandida épi z’ot ékip kosa zot i vé fèr kisoi in manda, kisoi dé pou vanj kont lo réshofman klimatik. Mi souètré zot i déklar sa dovan tout demoun, sak lé frazil, sak lé jenn, sak néna la krintiv dovan l’avn ir, kosa zot i prétan fèr pou bate lo réshofman klimatik atèr. I fo zot i di, dovan l’opinyon, kosa zot i vé fèr dann in mandatir-pétète dé !- pou mète nout péi dsi lo raye la lité kont lo réshofman klimatik.
Sa in késtyon kapital sa é pa in késtyon pou zapé !

NB - Mao téi di : « La Révolisyon la pa in diné d’gala ! » é zordi tout lé si tèlman grav, é tout i sava si tèlman vite, ni fons si tèlman vite dann mir, k’i fo trouv in parade lo méyèr posib é lo pli vite posib pou aport nout galé kont lo réshofman klimatik épou ède a sov limanité.