Oté

In késtyon konmsa an pasan : Si Paul Vergès té ankor la, kosa li noré di k’i fo fé dann so korona virus ?

Justin / 25 mars 2020

JPEG - 43.6 ko

Oplis i sava, oplis lo nonb de moun ataké par lo virus Covi-19 i kontajyone demoun isi shé nou La Rényon. Avan-yèr l’avé 71 ka, yèr l’avé 75 ka, talèr la proféktir i sava anons in n’ot shif ankor é mi oi pa pou kosa lo shif sarin bon shif pou nou. Normal in takon d’moun i sort déor dann bann péi kontaminé épi zot i rant La Rényon-konm dann in moulin, san kontrol, san suiv azot sof an parol mantèr dann lo l’asanblé nasyonal épi ayèr. Mi vé pa fé pèr pèrsone mé mi pans kant mèm si i kontinyé konmsa la maldi i sava instal aèl La Rényon é mète anou dann in ka ni pé pi fèr fass é pèrsone i pé pa ède ano fèr fas.

Si sak mi di lé vré-é mi fé romark azot la pa moin tousèl i di sa - si la kourb banna l’apré fé i aplati pa é si momandoné li mont an flèsh, mi pans i fo trouv bann solisyon k’i fo pou soign demoun é ni koné bien lo sèrvis l’ospitalizasyon i sava pa gingn fèr fas. Si li gingn pi fèr fas kosa i fo fé ? Mulhouse lété sirbouké la transport demoundann sid La frans, dann bann lopital an suiss épi dann lopital dan l’almagn. Dan la Corse laba la transport demoun dann bato ziska Marseille. Zot la mèm vi la mont an katriyèm vitèss in lopital kanpagn pou mète demoun dodan pars dann lopital sivil l’avé pi la plas.

Sa i vé dir sinploman si néna pi la plas dann in landroi, i mète demoun malad grav dann in not landroi é i transpor azot dann bato, sansa dann l’aviyon. Sa i vé dir galman si na pi la plass dann lopital i azout in lopital kanpagn-Dan La Chine épi La Risi la mont an vitèss plizyèr lopital pou trouv la plas pou d’moun malad.

Pou La Rényon kosa i fo fèr ? Dopi koméla san atann moi d’mé. Pou moin i fo prann légzanp dsi sak la fé ayèr - nou la pa zanfan batar kant mèm ! Sanm pou moin, i fo fé isi sak la fé ayèr é san atann i gingn arpi fèr fass. I fo konbine in pé tout moiyin la ansèrv é i ansèrv touzour pou sak i ariv dann plizyèr réjyon La frans… A moins k’i miz dsi lékatonm dann nout péi. A moins k’in pé i pran sa pou in zé danzéré - in sort roulète russ… La pa larzan i mank anou kant mèm ?

Mi pans in mésaz konmsa Paul Vergès nora gingn fé pasé é avèk la fors k’i fo dann in ka konm sak ni koné zordi.