Kosa i vé dir yèm son péi ? Sa in késtyon mi arète pa pou poz amoin. Moin konm d’ote ni di toultan ni yèm nout péi. Mé par l’fète kosa ni yèm égzaktoman épi san pour san ?

Ni yèm son kuizine. Lé vré, La Rényon, manzé lé bon mèm si li lé pa tro sofistiké, mé in pé partou dsi la tèr néna bon manzé. Zot i pans pa ?
Ni yèm son lang ? A sa lé sir, mi yèm son lang kréol rényoné é pa dopi yèr solman mé dizon tout bann lang lé émab pars konm i di souvan sé la mark lo zéni inpèp é lo zéni i pé pa z’ète vilin. Zot i kroi pa ?
Ni yèm son bann shanson ? Sa lé sir, mi yèm son shanson kan sé in bon konpozitèr k’i fé ali sansa la fé ali, é in bon shantèr k’i shant ali sansa ké la shant ali in zour. Spandan, partou dsi la tèr néna bon kalité shanté, bon alité shantèr é ni pé yèm in pé tout si ni vé. Zot lé pa dakor sanm moin ?
Ni yèm son bann péizaz ? Sa lé sir, ni yèm son bann péizaz, mèm si partou dsi la tèr néna zoli péizaz. Mi yèm son kalité d’moun ? Sa lé sir, mé kan mi pass dann i péi étranj sansa kan mi rogard bann fime, mi yèm osi bann moun étranj. Sa lé bien vré, zot i di pa ?
Ni yèm demoun sak néna zoli manyèr ? Sa lé vré osi, pars vilin manyèr i toush pa mon kèr pou vréman, mé ni pé dir in pé partou néna d’moun zoli manyèr. Mi majine zot lé dakor sanm moin ?
Ni yèm son bann bon zidé rényonèz ? Sa lé sir, mé mi yèm osi bann bon zidé néna dann lo mond antyé. Sa lé vré toulbon ?

In foi moin la fine di sa, mi domann amoin kant mèm pou kosa mi yèm mon péi La Rényon san trouv lo fin mo.
L’èrla mi di dann mon kèr, pou kosa in boug i yèm in fanm, sansa in fanm i yèm in boug, sansa ankor dé moun i yèm pou vréman inn-a-l’ot ? Pou toutsort shoz sansa pars konm in saz téi di : pars kan mi yèm, moin lé pi moin, mi dovien lo moun émé, é lo moun émé Ii dovien moin...
Zot i pansré pa sa lé valab osi pou in péi ? In rényoné i yèm son péi par in sort gatir I anmar ali èk son péi épi son péi avèk li. Kan mi pans mon péi, moin lé pi moin, moins é mon péi, émon péi, i dovien moin galman. Sa lé posib sa solon zot ? Moin mi pans ké oui, san foi oui, in takonn foi oui.