La Rényon, nana in bonpé lojman vide ; La prèv ? Pass dann shomin partou, ou va oir a-loué, a-loué, sansa pou-vann, pou-vann. Mèm, moin la tandi dir in lankète l’INSEE la trouv, issi, na plis lojman ké nana d’famiy. Mi koné pa tro koman la kont sa, mé daoir in pé d’vré dodan. Touléka, si ou na larzan, ou i pé gingn in kaz dann la zourné, a l’èr-la minite... kisoi in kaz-a-tèr, kisoi in kaz anlèr. Solman si ou la poin larzan, lé dir pou trouv in lojman sosyal pou ou... dann la zourné, rèv pa ! Dann l’ané, rèv pa non pli ! Défoi i fo ou i atann kèk z’ané, é kèk-la, sa lé long, sirtou si out famiy lé antassé konm sardine dann boite.

Konm i fo trouv in lésplikasyon, inn-dé moun in pé rasis déssi lé bor i trouv sé bann moun étranj k’i pran tro la kaz. Moun étranj i vé dir moun i sort Komor, Mayotte, Madégascar. Sak lé blan, i done azot près lo tit "rényoné par l’adopsyon". Biensir, sa lé pa vré, mé in pé na kroiyans de sa, dir konm fèr, alé oir sinploman i mank plis trant-mil lojman sosyal. Sa sé in vérité, é toute bann shif lé la pou aprouvé. Mé lé pli fasil rézone konm in tanbour, sansa konm in Lepen Jan-Marine san rod la rézon pou vréman.

Pou trouv in komansmann solisyon, mi pans i fo komans par okip tout bann lojman vide. Tansyon, pa an sovaj, mé in lokipasyon roganizé, ofisyèl, é sa la loi i pèrmète. In tan, Chirac la pa komans fé sa dann Paris ? Nana d’ote solisyon galman : moin la vi dann télé, na in landroi i done aou a loué out lojman brut é sé aou d’anshevé, avèk out bann dalon, avèk l’ède la Kaf sansa Konsèy zénéral. Nana ossi bann téknik pou fé la kaz pli vite é pli bon marshé, mé sa, mi sipoz, zot la fine li dann zot zournal préféré.

Touléka, i fo poz in bon késtyon pou gingn in bon répons. In mové kèstyon pozé, sé in répons malfondé.

Justin