Matante Zélida la ékrir Justin :
Mon shèr nové, mon spès tète dir,
Mi oi pa moin kossa bann rouj de fon nana pou arprosh méssyé préfé. Moin na konm dan l’idé zot i koné pa kossa zot i vé, kansa z’ot vant lé plin, kansa li lé vide. Kan li lèss demoun anbar shomin, zot lé pa dakor. Kan i anpèsh demoun anbar shomin, zot lé pa dakor non pli. Moin mi kroi zot lé kont li, in poin sé tou. Pé s’fèr zot i èmré li flate azot in pé, bate in pé dann z’ot do, dig-dig in pé z’ot dossou d’pyé. Kant mèm, moun-la i roprézante l’Éta, é l’Éta sé in n’afèr inportan, i fo li fé réspèk ali. Kossa ? In pti Rényon konm nou ni prétan fé lo rodomon ? Dizon in pti zanfan i amontr lo poin son momon. Alé, pran sa pou toi !

Justin la fé pou répons :
Mon vyé matant k’i koz toultan la boush rouvèr,
Si mi konpran aou byin, i fo ni kourb la tète. I fo ni arète pa di mèrsi, syouplé, bravo, mèm kan ni an apèrsoi le moun ou i parl i fé pa réspèk l’Éta konm li dovré, i fé déréspèkt ali. Pars l’Éta i doi pa pran parti pou inn kont l’ote, li doi pa an avoir z’ami dann in bor, z’ènmi dann in n’ote. Li doi pa shoizi la tète ! Sak ni oi, sé k’méssyé préfé i shoizi la tète : in pé na lo droi bar shomin épi li aroz azote avèk parol do myèl, lé z’ote na poin é i assonm azot avèk parol do fyèl épi kass-an-fèr. Tan k’a oute dovinète, sa i aplik anou konm in gan déssi in pate kanar. Fransh vérité, mèm si nou lé pti, nou lé pa d’akor k’i mank anou réspé, pou k’i amène anou an sharète shaviré. In késtyonn dignité pou lo pèp rényoné.

Justin

Lésplikasyon inn-dé pti mo :

Lo rodomon : lo robèl, lo movèz tète.
Pti zanfan i amontr lo poin son momon : in fèy fanjan tann.
Dig-digué : shatouyé.
Déréspèkté : mank réspé.
Shoizi la tète : fèr proférans.