In shinoi si li aprann pa lire épi déssine son bande karaktèr, lé kondané a pa konète. Pa pars sé lo shinoi, an li-mèm li lé tro difissil. Daoir in milyar d’moune i gingn lir in tèks an chinoi é parla mèm kantité i gingn ékrire in tèks an chinoi. Lé parèye pou toute lang é lé parèye pou nout lang kréol rényoné.

Lir épi ékrir in lang lé ni fassil, ni difissil, sa i dolmande in travaye é lé konmsa in poin sé tou !

Zot va dire amwin lékol i aprannde pa kréol é mi koné i aprande pa – sansa in pti pé léjèrman-, mé a bien kalkilé i fo pa baze dsi in linstitissyon k’i zoué pa bien son rol mé i fo shake pèrsone, shak militan, shak patriyote, i panss kréol rényoné sé noute lang sé a nou de travaye an konfyanss par rapor noute lang.

An konfyans pars noute lang kréol néna son kapab, shak moune néna son kapab,é si ni mète ansanb nou lé kapab goumante nout kapassité, pou ariv in popilassion létré an kréol rényoné.

Ni fassil, ni difissil, mé in késtyonn konfyans dann lo jéni sète noute lang é sète nout pèp, sète noute kiltir.

Ni artrouv pli d’van.

Justin