Médam zé Mésyé, la sosyété, koz èk moin sé koz èk in kouyon, mé sé o pyé d’lo mir k’I oi lo bon mason. Mézami, kozman moin la mark an-o la, sa sé in n’afèr sèryé. Séryé pou kosa ? Pars souvan dé foi demoun i pans si zot la antann in moun di in n’afèr sé la vérité vré-dizon la véritépir pork, mé la pa touzour konmsa. Lo saz i di, si ou la vi in n’afèr, kalkil si ou la pa tronpé. Si in moun la di aou in n’afèr fyé pa dsi pars néna bokou d’shans ou lé dan l’érèr. Dann lo droi i di : « Testus unus, testus nulus » é sa i vé dir : in sèl témoin sé konmsi ou l’avé poin témoin ditou. Alor kozman kréol i di in klosh in son é sa i vé dir la pèrsone lé parti pri la plipar d’tan ; dë son avèk demoun la pa ète dakor rantre zot lé pli pré par raport la vérité. Alé ! Mi kite azot rofléshi la dsi é ni artrouv pli d’van. Sipétadyé.