Toulmoun i koné in klou osinonsa in pointe. Zot I oi bien li nana in tèt é kan I fons sa dann boi avèk in marto la tèt I kal ali é li disparète pa konplètman. Lé sir ké si ou i koup la tèt ébin li disparète dann plansh sansa dann pyès.

Nou lé dakor ? Mé pou kosa kréol la konsèrv kozman-la ? Sirman pa pou lo sans prop ni sort oir mé plito pou in sans figiré. Sé koué lo sans figiré ? Mi pans sa lé an rapor avèk la tète demoun. I di pa in moun la pèrd la tèt ? Sansa in moun na poinn tèt ? I di pa ankor : la tète lé vid…

Donk, sanm pou moin, sa i vé dir si ou la poin la tèt ou lé fouti dann la vi é sé la k’i pé tiliz lo kozman nou la mark an-o la. Ala kosa mi majine ! Pétète zot i pans pa konm moin donk fé savoir si zot na in ptip éd’tan dovan zot. Ni rotrouv !