Oté

In konba i gingn sansa i gingn pa, mé amène pa li é ou lé sir anpèrd ali

Justin / 29 zanvié 2020

JPEG - 43.6 ko

Ma tante Zélida la ékrir Justin :
Mon shèr nové, mon spèss salté, roujde-fon dopi l’étèrnité, zot i koné zéléksyonn mèr i ariv dann pa lontan é biensir pou in b onpé d’moun konm pou bann rouj-de-fon sé l’èr d’vérité. Soi i naz, soi i koul ! Soi i tir la tète dann lo, soi i anfons la tète dann basin. Mé biensir koméla, tout demoun lé vinkèr. Tout demoun i sava ginyé. Tout demoun i gingn vréman : in pé la v iktoir, in pé la koréksyon. Avèk toulmoun i dévir azot lo do, pou mon par mi souète azot gingn lo dézyèm zafèr. Tok ! Pran sa pou toué !

Justin la fé pou répons :
Mon vyé matant, k’i koz toultan la boush rouvèr, mi antann aou rakont out bann kolibé, mi antann aou apré moukaté, mé konm dabitid, ou i éfas tout bann vré problèm pou pran zéléksyon pou in bataye kok. Poitan, matant, sa la pa in bataye kok pars si bann zansien l’avé vi lé shoz konmsa ousa noré té out rotrète, ousa noré té out lozman, out lo kourant, out léstrésité épi l’égalité, é lo bann droi nou néna zordi nou l ’avé poin dann tan lontan.
Matant m’a dir aou, in zéléksyon pou nou sé la lite, sé la konkète bann nouvo droi, sé in shomin pou amélyor la vi nout konsitoiyin. La pa ditou in bataye kok, ni in manyèr pou gonf lo pla bann profitèr. Alor matant, in konba sa i gingn sansa i gingn pa, moin lé dakor. Mé na poin pli sir manyèr pou pèrd in konba ké si i amène pa li ditou. Pou nout par ni pans in konba sa i fo améné. Tok ! Pran sa pou ou !