Gouvèrnman la déside fé in konférans pou bann péi l’outre-mèr. In tan, l’avé di i fé sa dann Paris é konm in pé partou mé sirtou La Rényon demoun té pa tro dakor la di va fé inn dann shak péi. Somenn dèrnyèr la fé inn dann Mayotte. Lindi-mardi va fé inn La Rényon. Solman konm fèr sinp lé bien konpliké, la déside fé lo z’afèr in drol fason. La prèv ? Ékout zot mèm :

Lindi èk mardi sèt somenn va fé kat z’atlyé, inn par domi zourné. Moin la mèm antann dir inn noré konm prézidan Didier Robert, in n’ot Valérie Bénard in madam i koné in réyon dsi l’ilétrism, dizon èl i koné sa par l’intèryèr. Lé z’ot prézidan, mi koné pa, mé déza avèk dé moun konmsa lé shoz lé bien angazé. Lol ! Aprésa, sak i vé va lans zot propozisyon par internet ziska lo 14 novanm. Aprésa, va fé in konférans nasyonal dann Paris... Ni artonm konm avan, é lo diskisyon dann bann péi l’outre-mèr lé la arienk konm parad.

Mé kosa va déside dann la konférans nasyonal ? Va déside rotien sèt-uit prozé soidizan pou avans bann péi l’outre-mèr. A bon ? Avèk sète uit projé va tir anou épi lé zot dann malizé. Séryé sa ? Konm di lo kont, moun vilin na ankor, mé moun kouyon na pi tro sa !

In dèrnyé pti mo/ mi vann sa konm moin l’ashté. I paré la invite san trant pèrsone, mé an parmi nana arienk vin Rényoné. Lo rèst, sé dmoun déor : kisoi diréktèr, kisoi prézidan, mèm in pé lé pédézé. 

In ga la domann amoin si sa sé in n’afèr sèryé. Moin la réponn ali mi koné pa mé sak mi trouv drol sé ké lo z’afèr i fé an misouk. Moin la mèm pèr sé in konférans pou la po d’patate.

NB : sansa pou kosa bann sosyalis i anparl pa d’sa ? Sansa pou kosa bann zournal i bate pa tanbour ? Sansa ankor, pou kosa bann z’invité-la, sé lo mèm moun la bate nout lékonomi dann fon kivète ? Mi pans i pé fé rir sof ké nout péi lé dann l’anboulkidi.

Justin