Poitan nou lé bien loin d’lo konte. Pou kossa ?

Pars pou fé avanss déssèrténn shoz dann lintéré noute péi, dann lintéré lo pèp rényoné, nou néna poin lo pouvoir réèlman. Sansa dopi lontan néna dé shoz ké nou nora fé avanssé épi dizon sa nora amenn anou dann shomin noute dévlopman réèl.

Si mi di azot lo pouvoir lé éklaté ébin na poin arien k’lé pli vré k’sa. Konsèye réjyonal na poin toute pouvoir, konsèye départmantal non pli, alon pa anparl lo mèr pars son pouvoir si lé lé réèl néna bien plizyèr domenn li rante mèm pa d’dan... Si ni azoute ankor avèk sa lo léta lokal zot i konpran bien lé bien difissil, mèm inpossib rokol bann morsso pou ariv in politik i sava vréman dann sanss noute lintéré.

Poitan kan i konfyé anou in sèktèr, ni gingn fé avannss ali é zoliman. Agarde arienk bann lissé. Mwin la konète lo tan l’avé arienk dë troi lissé issi shé nou, mé kan konsèye réjyonal la gingn pouvoir fé konstrui bann lissé ébin in kantité la mète a poussé konm sanpignon : lissé zénéral, lissé téknik, lissé proféssyonèl. Ni pouré ossi anparl konsèye départmantal pou bann kolèj é ni koné koman sète afèr-la la avanssé.

Astèr si ni diré in l’assanblé lé konpétan pou dévlope l’agrikiltir dann sanss l’otosifizanss, ni véré bann progré é vitman siouplé. Parèye pou lotonomi dann lénèrji, parèye galman dann la politik dévlopman ékonomik.

Wala pou kossa mi panss konm noute parti é dopi lontan in konféranss téritoryal sré in bon afèr pou nou. Zordi ni oi lé shoz i avanss pa konmsa lo pouvoir ni pouré avoir nou la pèr i bril noute zèl.

Ok ni avanss pa, mé ni koné galman noute péi é noute sossyété la bézoin avannssé é ké i pé pa kontante anou d’in pouvoir inkonplé, éklaté, k’i pé pa amenn anou vréman dann lo bon shomin noute dévlopman.

A bon antandèr, salu !

Justin