Kosa i lé in kontre-fe ? Sa in n’afèr téi fé souvan dann tan lontan. Kan lo fé té i pète dann in karo kann, lo bann planter téi koup in bon lèz kann par dovan lo fé, épi té I mète do fé a partir d’la lèz. Dofé té I grenn la-dan épi kan téi bite avèk lo fé k’i ariv na pi arien pou brilé é lo fé téi arète.

Donk in kontre-fe, sé in téknik pou vanj kont do fé avèk do fé… Sa i pé z’ète vré pou d’ot zafèr ké lo fé, dann sak i apèl son sans figiré. In légzanp i ariv dann mon majinasyon sé kan désèrtin politik lé mayé dann in n’afèr d’loi é zot i déklansh in manifèstasyon kont in n’ot z’afèr pou détourn l’atansyon l’opignon d’moun. Konmsa kan lo z’anuiman i ariv demoun lé a d’mandé si lé vré, si la pa vré, si la pa solman in manyèr pou tronp demoun. Mé lakèl i tronp demoun, Lé pa fasil démayé. Sa i pé apèl galman in kontre-fe.

Kosa zot i anpans ? Arien ditou ? Fé travay z’ot koko ! Fé bouy z’ot mtyèr griz ! Zot va oir ké, rant-rant, ni pé z’ète, tazantan dakor rantre nou !