La-ba dan la Frans, na in vil i apèl Niort. Dann vil-la l’avé in lizine. Katrovin pèrsone té i travay dann lizine-la, épi té i fé zoli-zoli linz. In zour, bann propriétèr la fèrm lo lizine, pars d’apré zot, té i gingn pi assé larzan, té i fé pi assé bénéfis. La fèrm lo lizine, pou ar-rouv in n’ot dann péi déor.
Solon zot, kossa la fé avèk bann travayèz ? Bin, la bate déor, in poin sétou, la lisansié, la rash le kro, épi la done azot in moné épi larzan shomaz. Apré sa, té i rèss azot arienk’lo zié pou pléré !
Lo zié pou pléré ? Non, pars sèz dan la bann, sé bann fanm kouraz. Zot la ramass z’ot prime. Konsèy rézional Poitou-Charente la donn in kou d’min. D’ot partnèr la done la min... Sa la pèrmète azot rouv in pti lizine pou fé bann gayar linz, bann linz de liks. Zot la poin patron. Zot la fé in kopérativ toulmoun lé égal anndan.
Kossa i pé dir la dsi ? Koman lé shoz va tourné ? I koné pa, mé pou linstan, zot i travay épi zot lé kontan travay. Pou zot, zot sé d’moun pou vréman é zot lé pi shomè. Sirtou, sa in légzanp, pars sak i gingn fé la-ba i pé fé in n’ot koté, i pé fé issi. Pars kan ou nana lidé k’i fo, ou nana la volonté, é ou i pé an avoir in pti moiyin, ou i pé fé in n’afèr.
Épi, in kopérativ, mi pans sa i marsh bien avèk dévlopman dirab !

Justin