Na poin tro lontan moin la lir dann in zournal, la Rényon i fil vitès gran V dann la diréksyon l’asanblé unik. Pou kosa li la ékri sa ? Pars lé késtyonn siprime lo départman d’isi 2020 donk v’arès la Réjyon avèk in bonpé pouvoir épi bann kominoté d’komine in pé ranforsé… Mi di sa konmsa, mé sak mi romark sé ké lo gouvèrnman la pa di sak li vé vréman dann bann péi l’outre-mèr é tout fason gouvèrnman la fine ariv si tèlman faye mi domann amoin kosa li pé fèr pou vréman ziska dé mil disète.

Mésyé Virapoullé, pou son par, li di li la fine si tèlman tak bann z’institisyon ké konm té i di dann karnaval : "Sote koman ti vé coco, toué lé pri dan la min korbo !". Aprésa li ardi : majine in kou in réjyon avèk in bonpé pouvoir é in moun la tèt lé bloké konm prézidan, é bin nou sar joli. Romark li sé in éspésyalis la tèt bloké li, afors li la fine fé d’tor nout péi. Protokol kann 1969, sé li ! L’alinéa sink l’artik 73 la konstitisyon sé li ! Lo dèrnyé frodèr zéléksyon ankor vivan sé li é lo rèstan la pa bézoin kozé... Partou l’avé in mové kou pou fé li té la dan. Domaz désèrtin la résisite ali politikman. Mé lo pasé, sé lo pasé, é i vo myé nbien rogard lo prézan épi lo fitir.

Lé vré nana bonpé danjé pou nou si tèlman la politik gouvèrnman droit konm gosh l’amène anou dann malizé. Lé vré la politik l’intégrasyon la bien kontraye nout l’avnir mé lo pèp rényoné lé la, son bann bone volonté lé la, in zénès instruyé galman,.. La Rényon lé la osi. L’androi ni lé, lé vré nou lé pa bien asiz mé mi pans ni pé sort dann trou, si toute lo bann bone volonté i trouv in térin l’antant. Mon bann dalon nout péi nana zatou dann son min, li na in bon jé, avèk bann solisyon k’i fo sirtou zordi avèk lo dévlopman dirab é, mé lé vré toultan ké bann jouar sar mové... lé difisil prévoir in bon l’avnir. Mé bon jouar nana osi ! Arzout èk sa, nout listoir lé konmsa : in kou d’manké, in kou d’réisi. Ni sort manké l’ané 2010, donk proshène foi ni doi réisi.

Justin

NB in kou d’manké, in kou d’réisi : 1792 la aboli lésklavaz, in kou d’manké la rétabli pou anshèv ali l’ané 1848 ; l’égalité sosyal an 1946 mé la manké pou réisi l’ané 1988. nout dévlopman manké l’ané 2010 pou réisi biento. ; l’asanblé inik mank l’ané 1981, pou réisi, mi éspèr, san tardé.