Toute demoune i sèrv azot dann bann rivyèr-la pou la késtyonn d’lo avèk son bann zizaz lété bien annuiyé. Donk sé pa gouvèrnman, sépa la vil li mèm, la désside fé tonm in kou la plui artifisyèl. Antansion, sa lé sèrtyé, sa la pa in plézantri… I égziss bien in métode pou fé tonm la plui artifissyèl é sé in métode k’i égziss dopi katrovin zané a popré.

I sifi bonbarde niyaz kou d’sèl. In kou konmsa é la plui i mète a tonbé. A ! Pou tonbé li la tonbé é an kantité d’apré sak i paré é dolo la koulé, la koulé konm vash k’i piss ! Mé konm bann kanal té boushé, konm bann rivyèr té ankonbré avèk déshé, sé bann zabitan la gingn dézagréman ; la rivyèr la koulé, mé dolo la anvayi bann kaz é konm i di, la fé in mal pou in bien - linondassion é toute lo tralala ! Parl pi demoune apré souplégné, domaz ba poin fridom laba, pars pou kozé nora kozé.

Astèr banna lé oblizé komanss par oussa zot noré du komanssé ; nétoiye toute bann kanal épi déboush lo li la rivyèr pars fransh vérité té par la k’i falé komanssé… Mézami sa i rapèl amwin kan mwin lété pti é ké la plui téi vé pa tonbé ditou. L’èr-la la anvoye laviyon Samat pou bonbarde bann niyaz mé mank de shanss la plui la tonm an mèr é toute bann névène la fé apré la pa nyabou fé tonm la plui pandan in bon koupe de tan.

La rézon ? Mi panss Bondyé lété pa kontan pars dann tan-la téi fé la frode dann zélékssyon épi sète ané-la na dmoune lé mor é lo préfé la la déklansh in linterdikssion marsh a pliss troi pèrsone dan lo péi. Lé dir fé prosséssion sirtou kan i gingn pa marsh a pliss troi pèrsone é ké bann kominiss téi vépa partissipé pou la rézon ké ni koné.

A bon antandèr salu !

Justin