Mi supoz konm moin, zédi soir, zot la rogarde lo match foutbal rante lékip Mexique épi l’ékip La France. Mi mazine la plipar bann rényoné lété tris… pars zot i koné dann fon nout kèr nou nana, dé patri, in pli gran é l’ote pli pti, la France et La Rényon. Donkalor la défète lékip de France, sa i pé pa rann anou kontan. Mi sava pa fé in kritik lo match, pars nana in bann komantézèr pou sa, in bann moun i koné foutball déssilo boute zot doi. Mé nana in n’afèr, parmi lé z’ot, k’i késtyone amoin in pé. Sé lo nonm kou d’pyé arété, konm i apèl sa, té i fini an lo d’boudin. Poitan, si mi rapèl byin, an parmi bann foutbalèr fransé, l’avé in sèrtin Platini, kaziman l’invantèr lo tiraj modèrn bann kou fran. Si i suiv son légzanp, sa noré di fèr parti la kiltir foutbalistik bann fransé. Mé lé pa sa ditou ! Akoz sa ?
Pars pétète, dann lékol foutbal, in pé i di Platini l’avé in don… byin tir kou-fran. In don ? Sa sé in n’afèr natirèl, mé lété pa sa ditou. Mi pans li lété adroi épi li la bokou travay, donk sé in n’afèr kulturèl. Zordi, nana film, nana roportaz, i pé mèm dékonpoz in mouvman in boug la fé dann tan. Alors akoz pa artrouv so bann jèss, so bann téknik, so kultur d’foutbal, pars sansa koman va avansé, koman v’alé pli loin, koman va fé in n’afèr d’byin. I gingn pa fé solon zot ? Byinsir k’i gingn, pars mi ansouvyin Juninio, in zouar Brésil… boug-la l’avé pran modèl déssi Platini… li té i mark mèm son bann kou fran. Pou li solon l’moun, in kou fran, lété konm in pénalty.

 Justin