Oté

In kouyon lé danzéré pars la kouyonis lé danzéré épi lé kontazyé. I fo pa bingn ladan Madam Girardin é pou moin ou lé an plinn dan !

Justin / 29 novanm 2018

JPEG - 43.6 ko

Madam Girardin, moin lé a d’mandé pou vréman kosa ou la vni fé isi La Rényon. Moin lé a d’mandé si ou la vni pou vréman pou rode lo bann solisyon k’i fo pou règ bann prob lèm La Rényon. Sansa si ou la vni, sinploman pou roul kréol dann la farine-sirtou si sak lé an fas de ou néna poin vréman bann solisyon pou aport pou nout bann problème. Pétète ou la vni sinploman pou an avoir konm in prétèks pou dir ou la fé avans plizyèr ropozisyon, é bann rényoné la anvoye aou baladé.

Alor ? Pétète ou i pé dir, ou i sava gingn fé pourir lo mouvman é kan li sar pouri kosa i fé ?

Antansyon madam, mi di pa ou sé in zéro la gosh in shif. Mi di mèm pa ou la tyé kouyon pou pran son plas. Mi pé di kant mèm ou i koné plis Sin-Pyèr Mikelon ké bann zil tropikal konm La Rényon épi d’ot ankor… Lé vré ou la vni Mayotte é pétète ou lé fyèr sak ou la nyabou fèr laba. Mé Mayotte avèk La Rényon la pa lo mèm taba. Laba, banna té apré rode koman fé prann azot vit-man-kon plèteman dann pyèz l’intégrasyon. Zot modèl té La Rényon, donk téi sifi done azot kékshoz i égzis déza. Problèm : zot i oi sa konm la poul na zèf an or é lé pa ditou sak zot i kroi. Mé La Rényon ? Kèl modèl ? Modèl la poin. Kèl dévlopman ? Nou la fine rate nout dévlopman é pa arienk in kou. Don k pa d’modèl, i fo invanté !

Lo problèm sé ké sak la fine rofléshi pliské lé zot-nout parti néna soisant zané, zot i vé-d’apré moin kékshoz gouvèrnman i vé pa : moin mi apèl sa la libérasyon sosyal épi la libérasyon nasyonal. I pé azout lo kiltirèl él’anvironemantal. Mé i pé apèl sa otroman si zot i vé… Madam Girardin l’avé isi shé nou in moun té apèl Paul Vergès é moun-la l’avé travaye zour konm nuite dsi l’avnir La Rényon, in moun l’avé katrovin dizan léspèryans dann la konésans nout péi é gouv èrnman-kisoi gosh konm droite - téi vé pa i aplik La Rényon sak li téi vé konm solisyon. An touléka konm l’ice bèrg (ou i koné bien sa madam Girardin-néna sa dann la réjyon ou i sort) lo parti k’téi oi pars, d’apré moin, zot l’avé pèr ankor plis la parti zot téi oi pa.

Madam Girardin, mi pans ou i koné domoun isi La Rényon. Sé bann boug la éshoué dann zot solisyon dopi in bon koup de tan, mé dsi la késtyonn nout dévlopman ni pé dir sé in bann zéro la gosh in shif. Sé mèm demoun la tyé kouyon pou prann son plas. Lo problèm sé ké bann kouyon lé danzéré pars la kouyonis lé kontazyé. Madam ou lé mal antouré, ou lé mal konséyé. Out lantouraz i bingn dann la kouyonis é sa la pa in bon bin pou pran pli souvan k’i anfo.