Moin lé a d’mandé koman Konsèy réjyonal-la sa lé konpliké konmsa : konpliké pou konète kèl sé son konpétans. Fransh vérité, si mon tète l’avé bloké é si moin té i vé prézante in list pou zéléksyon-la, moin n’ora été byin an-nuiyé, vik mi oi in pé d’kandida byin instruiyé i tronp... i di zot va fé si, ou byin zot va fé la si zot i gingn zéléksyon, alé oir, Konsèy réjyonal na poin konpétans pou sa.
Mi rapèl byin kan lo zoli garsonn Tampon, pars li vé pa tram-train, la di li nana in solisyon pou donn demoun transpor, sé mète dé mil kar déssi la route épi donn travay kat mil pèrsone. é élas, ménélas, Konsèy réjyonal na poin konpétans pou sa... alors, son kozman té in kozman an l’èr, in kozman initil, in kozmann moun i koné pa la loi. Byin domaz pou in dépité ! Li la gingn in boush ta guèl byin mérité.
La pa sifi ali, vi k’dann télé, son dalon, in sèrtin Cadet, la di li vé donn toulmoun in kaz-a-tèr pou rès dédan : li lé for, boug-la, toulmoun dann kaz-a-tèr !... arzoute èk sa, Konsèy réjyonal i okip pa lojman. Donkalor, in kouyonis, sé in kouyonis, é i fo prann ali pou sak li lé !

 Justin