Koman mi konpran sa ? Mi panss kan i koz avèk son tète, sa i vé dir koz avèk son intélizanss é koz avèk son kèr sé koz avèk sak lé pli intime an li mèm, é li sézi par son kèr in vérité néna d’ote dimanssion k’in vérité sinploman intéléktyèl..

Si mi di azot astèr, kan défin lo pape Jean-Paul 2 la vni La Rényon, li la fé in gran diskour dann la lang bann franssé é biensir lété in diskour la pèrmète ali soulèv bann gran problèm l’imanité. Mé toudinkou le pap la di in kozman dann la lang kréol. Mi panss zot i rapèl sa. Téi di : « Rest pa dann fénoir, viens dan la limyèr. Mète de koté sac la pa bon é marsh droite, èk zot konsyanss droite. Solèy i lèv, soley i dor, la lune i lèv, la lune i dor. Zot mèm la lumière i éteind pa.. »

Mi pe dir azot kozman la parti droite dan mon kèr é sa la toush amwin pliss in gran diskour dann in ote lang ké nout kréol rényoné. Zordi sa i ède amwin sézir lo sanss lo kozman Nelson Mandéla. Biensir kan lo prézidan Mandéla téi koz avèk demoune dann zot lang té pars dann péi-la néna in bonpé lang matèrnèl d’in bonpé pèp é sé pou sa li téi di sa mé pa solman d’apré mwin.

Avèk lo kèr wi sézi bonpé d’zafèr wi sézi pa avèk sinploman out lintélizanss. mi kite azot rofléshir la dsi é ni rotrouv bien antandi.

A bon antandèr salu !

Justin