Mi romarke plizanpliss de moune i ansèrv nout kréol rényoné pou mète sa dsi bann zafish kissoi pou bann fète, kissoi pou bann manifèstassion artistik, sansa kiltirèl é mi trouv sa sé in bon zafèr pou la kominikassion donk in bon n’afèr pou nout langli mèm.

Mi romark galman néna plizanpliss bann liv, bann rovi épi bann pti zoinal dann la lang bann franssé épi ossi dann la lang kréol rényoné é sa sé kékshoz mi apréssyé pars opliss nora zafèr konmsa opliss sa va rann sèrviss nout lang, nout promyé patrimoine nout pèp.

Astèr, pou nout toute kominikan dann la lang kréol rényoné i fo ni tienbo kont nout résponsabilité dann sak mi pé apèl in révolission dann la kominikassion. Ni pé dir si demoune i lir bann zafish épi bann slogan lé dsi promyé zafèr, i fo demoune i konpran anou, nout méssaz épi nout kominikassion.

Na poin lontan dann in kabiné doktèr mwin la lir in l’afish dossi lo burn-out lété dann kréol rényoné : pou mwin li lété bien fé é li téi antrènn pa nou dann la konfizyon… Mé imazine in pé ké lo bann mo té mal shoizi, lo bann konsign té riskab fé pass in méssaz a kontrossanss. Zot i panss pa ké sré riské pou toulmoune défoi ké wi fé sak i fo pa, défoi ké lo méssaz i pass pa, sansa i pass pa bien. Tan pèrdi, gaspiyaz é mèm plisské sa.

Alor promyé zafèr i fo tash moiyin lo méssaz lé klèr, fassil pou konprann é itil pou la pèrssone i lir lo méssaz. Si li lé klèr, fassil pou konprann, épi itil ni toush nout bi, sansa atansyon pangar.

A bon antandèr salu !

Justin