Oté

In l’anploi vèr konmsa, pou li, sa lé dégradan !

Justin / 10 mé 2011

Moin na in dalon i travay dann in l’asosyasion péyé par Konseil régional. Le ga, ziska issi, lété kontan vi k’sa té i pèrmète ali gingn in pé son soso. Donkalor, li té anplègn pa tro ziska zordi, touléka pa dovan l’moun. Konm li la, d’apré sak i paré, nana in bon pé. Son boulo i apèl "anploi vèr". Na poin lontan, moin la trouv ali épi moin la dmann ali, o-zis kosa li fé ?
L’èr-la, li la di amoin, son l’asosyasion l’apré fé in trotoir pavé kosté sanm in gran rout. Li la rakont amoin, zot lé divizé an troi lékip : inn i fouy in foss, l’ote i amène galé i sort bor d’mèr, lo troizyèm i antass galé dan la foss pou fé lo trotoir. Li pèrsonèl, li lé pa fyèr pars li port galé déssi son tèt, dann gro solèy… li trouv banna i pran azot in pé pou bagnar ; sèl z’afèr i mank azot, sé in triko réyé konm dann Popèy. Tyé l’kor konmsa, sa lé pi itil koméla !
Pou li, sré konm si li sort la polis pou tonm gard-shanpète, pars li l’avé in boulo dann batiman é li té kontant avèk sa, pars pou li, té in n’afèr vréman bien, fé la kaz pou dmoun, kisoi kaz-a-tèr, kisoi l’imèb, épi sa i gonf in pé myé lo pla d’moun. Alé oir, koméla, li l’apré fé konm in zé d’ti kaz, avèk la shalèr épi la transpirasion anplis. Moin la pa di ali riyin, vi k’tout la sosyété té apré di ali pran kouraz ziska k’in zour noré z’afèr pli intérésan pou fé. Mé, fransh vérité, pou moin, sa in manyèr abès lo moun, pars travay pou travay, sa la pa valab. Travay pou anbéli l’androi, mi pans sa lé valab. Travay pou aprann in nouvo métyé, mi pans sa ossi lé bon, sirtou si ou i gingn tir parti out lékspéryans. Mé pa sak li l’apré fé. Pars sak li l’apré fé i ansèrv arienk pou ète dépandan par rapor in pouvoir épi diminyé d’valèr par rapor li-mèm ; Pou li, sa lé dégradan !

Justin