Nana in bon pé kalité l’èr : l’èr k’i réspir, lo bon èr, lo mové l’èr, l’èr la mizik. Déssi la késtion l’èr la mizik, in pé ou i èm, in pé ou i èm pa : ou i èm akoz ou la grandi avèk, akoz sa i ramène bon souvnans dann out tète, akoz sa lé konm dann out san, mèm si ou la zamé koni ali avan. In pé ou i èm pa akoz la pa dann out gou.

Nou issi La Rénion, ni èm bonpé la mizik, épi ni fé konmsi lé a nou, pèrsonèl : in séga bien améné lé gayar, in maloya bien apiyé lé bien galman, régé sé konmsi Bob Marley i tonm nout famiy... m’arète la akoz mi pé pa di tout.

Mé na dé foi, mèm dann kalité la mizik ou i èm, nana in pé mi aprésié pa : in séga mal kadansé lé pa gayar akoz kan ou i dans, ou lé riskab trok lo pa, épi l’èr mèm i plé pa ou. Kan ou i ékout, ou lé riskab pèrd l’èr ! Dizon, tout kalité mizik ou i èm, si li lé baklé, si na poin in pti zétinsèl talan anndan, bin, lé pa bon. Na in kamarad i di souvan : dann tout zafèr, i fo in pé talan épi bonpé travay, in zékli talan pou in bon pé transpirasion. Mi pans sa lé vré pou vréman !

Si na poin talan, si na poin travay, lé mol, sa lé sir ; sof si nana in gouté éstraordinèr. I pé arivé, mé lé rar, pa konm korn lapin mé prèské.

Alor, la mizik lé konm tout zafèr i fo aprann. Kan ou koné, i fo ou i amélior aou, épi i fo pa ou la pèr transpiré, sansa ou lé riskab, konm di mon granmèr, fé in l’èr k’i vo pa la pène, in l’èr la mori griyé. In l’èr i fé pa fonn nout kèr.

Justin