Souvan-défoi mi antann dir, in l’État sé konm in famiy. Lé dé na in bidzé. Na in rovni épi li fé dépans. Kan la poin asé larzan pou fé tout lo dépans é-bin li anprèt larzan. Mé kan li la anprété i fo li rann, konm di lo kont, kapital épi zintéré. Si li na lo porkoi an konsékans, lo ranboursman i ral ali in pé déyèr, mé koman-koman, li trouv son boute. Konm li la zèr son bidzé an bon pèr d’famiy épi konm li sé in bon klyan, é si li la anprète dann in bon péryod, li ariv zoin lé dé bout par l’milyé.

Sa lé vré, konm pa, pars la pa toute l’État i zèr son larzan konm i fo, konm pa toute famiy i manyé bien son larzan. Lé bon kozé, mé i fo bien maziné, nana in pé nana si tèlman pti moiyin, mèm, konm in pé i di, zèr lo kotidien sé konm in misyon inposib. Sa lé vré pou bann l’État é sa lé vré ossi pou in gran kantité dmoun. Mazine in kou tousa d’moun na poin in bon travay, la mèm poin travay ditou é kan sa i doizète in sityasion éksépsyonèl, la pi éksépsyonèl ditou, tèlman lé konmsa dépi promyé zanvyé ziska trant-é-in désanm, moi pou moi, l’ané pou l’ané.

Alor, i fo pi parl prète larzan pars pèrsone i vé pi anprète aou. É kan ou i ranbours pi pars la trang aou, é bin bann bank lé pa kontan èk ou... I bord aou, i mète aou dsi koté. Sa lé vré pou d’moun ? Biensir lé vré é pa arienk pou in pti trépé. Lé vré pou bann z’État ? Bin oui, é sirtou pou bann sak ou i antann pi kozé, mèm sak ou i antann kozé konm l’Arjantine. Oui, pars figuire azot in zour so gran péi-la la tonm an fayite. Dépi tan-la bann gran bank privé, mèm lo FMI i boykote ali. Pars, la trang ali é li la rofiz mète aznou dovan banna. Boudikont, in l’État lé bien konm in ménaz touléka déssi la késtyonn larzan.

Justin