I pé dir boug-la lé pa aryink lo komansman d’in kouyon,sré mèm in konplé...Boug-la ! Kèl boug-la ? Etienne Raoult, dépité...Ni an souvyin, lo ga la vni La Rényon pou tyinbo lo rin Bénard, dann zéléksyon Sin-Pol...Ni ansouvyin, li l’avé di, k’i fo pa mète Huguette anlèr pars sré domaz, lindi d’apré, noré rèss aryink troi péi kominis : La Corée,Cuba épi Sin-Pol...Son kozman lété si tèlman intélizan ké Bénard la gingn in batlavé pa pou zoué.Près sète mil voi, dan la tète.
Mé la pankor fini son forfé !Dépi inn-dé somène, ala k’li krétilk in l’ékrivène, Marie N’Daye, k’i sort gingn lo pri Goncourt ,pars èl i shas pa èk Sarkozy...Soi dizan pars bann z’ékrivin koni nana in dovoir d’ rézèrv...Olèrk an avoir la plime lib, so kou issi, i fo zot nana la plime karséré.Mé la p’assé, mète ankor ! Ala k’li arzoute in kouyonade an plis...
So kou issi, méssyé Raoult, i fé in l’éspès zanbrokal avèk lo nom Marie N’Daye, Yannick Noah épi Lilian Thuram,pars tou lé troi lé pa d’akor avèk Lo Prézidan...Lé ga, bononm-la, sré pa in pé kont bann madam...sré pa galman in pé kont bann noir ?
Touléka, i arsanm in pé byin.Poitan bann pèrsone-la, lé fransé vi k’sa lé marké déssi z’ot kart d’antité...Alors, kossa i fo konprann ?...
Moin mi konpran konmsa : si ou lé fam, é si ou lé blak i fo ou i bate la min, di bravo,pou toute sak gouvèrnman i fé, mèm si ou i aprésyé pa sa ditou !... L’èr-la, mi anshèv dir,in l’idantité nasyonal konm sa, mi kroi méssyé Raoult i pé gard sa pou li, mèm mète son moushoir par dsi.

Justin

L’ésplikasyon inn-dé pti mo :
Marie N’Daye : prix Goncourt 2009 pou son dèrnyé roman "Trois femmes puissantes"....
son forfé:son mové l’aksyon
in batlavé pa pou zoué : in koréksyon séryé.
i shas pa : i antan pa byin avèk !
z’anbrokal  : in manzé mélanzé
la p’assé mète ankor : sa in kozman bann siportèr pou ankouraz z’ot l’ékip pou mark plis lo bi..