In gob ? Nou téi poz gob, kan nou lété marmay, pou trap zoizo... In gob, sé galman in tik-tak pou mète ladvèrsèr dann in fotrin : li kroi li sava gagné, alé oir li pèrd épi li rèss kamï... Tousa pou koz dsi.
In nouvo laksidan kwasa-kwasa, la tié in bonpé dmoun...
La-dan, nana in kékshoz i zène amoin pou vréman... Akout amoin bien : Bato-la té i sort Anjouan dann nor pou alé Mayotte dann sïd. Bann bato fransé i patrouye rant lé dé, donk si lo bato réfizié i sava dirèk, lé riskab fé trap ali, alor li désid bat in gran karé pou évite la patrouy bann fransé.. Kossa in bon militèr nora kalkilé ? vik li koné bien mantalité bann réfizié : sa bann moun i sèy, toute fors, rant Mayotte. Zot i an pé pi viv dann zot péi d’néssans.
Bann militèr fransé, nora pi mazine, mète in dispozitif an plis pou anpèsh kontourn lo bann patrouy dabitid... Sansa lèss lo mèm patrouy dabitid san rod bar la route bann kwasa-kwasa... Li koné lo tik-tak banna épi li gnor pa non pli bann danzé la mèr, dann livèr, Sirtou dann parkour lo kwasa-kwasa la désid fé..Touléka, in ta lo mor an pliss !

Justin