Lé ga, éskiz mon pardon si mi anparl azot ankor in foi la lang. La lang sa sé in n’afèr kapital. In pé i di, sa sé in fason oir lo mond. Donk si ou i koné in lang ou néna in vizyon dsi lo mond. Si ou i parl dé lang, ou néna dé vizyon. Avèk troi, néna troi vizyon. Si ou lé parl-pa, ou néna out prop vizyon dsi lo mond si ou i antan pa lé parèye. Donk i fo zamé mépriz la lang demoun. Zamé pars in lang sé in n’afèr éstraordinèr ! Par raport li mèm i amenn bann pèp dsi lo fon batismo.

Li pèrmète aou mète lo mond an son, an limyèr an lodèr. Mète lo mond an mo, an fraz an kozman, an fonnkèr épi osi mi diré an mizik. Li pèrmète aou kominik avèk lé z’ot, é rotrouv aou kan ou lé an parmi. Si ou i koné pa lang lé z’ot lé konmsi ou lé dann in mond ou i ko npran pa, out tète lé anklavé, é ou lé a d’mandé ousa ou i lé… Mi rapèl in zour, dann in kongré l’avé dmoun in pé tout péi. L’èrla lo roganizatèr la domann toulmoun koz in lang pars tradiktèr l’avé poin. In pé la koz kant mèm z’ot lang é sa la mète in pé dézord dann park kanar - mé pétète zot té la arienk pou sa !

Si mi di azot késhoz, zot va trouv sak mi sava di in pé kouyon, zot va di mi fé l’intérésan. Poitan mi pans téi falé fé konmsa. Ala lo zistoir vré mi pé jir azot. Donk, in zour néna poin lontan bann shagosien la vni La Rényon é zot la pass Sint-Sizane é l’arète in kou dovan léstatu Edmond Albius épi la ésplik son vi, sak l’ariv ali, épi sak li la trouvé é koman li la trouvé. Shak fraz la pèrsone téi arète pou lèss lo shèf lo délégasyon Shagos tradui son kozman. Moin la pans pou z’ète poli é tout demoun néna lo mèm linformasyon, té i falé fèr sa.

Pars néna dé manyèr fèr : kisoi ou i fé lo dikourèr épi in pé i konpran pa ou, kisoi ou i koz langaz toulmoun i konpran é sa, sanm pou moins sé la politès i domann sa-la politèss lé né avan nou !- épi pou z’ète éfikas… Zot i konpran ousa mi vé arivé ? Mi vé ariv dsi la késtyonn médya, dsi la késtyonn lékol, dsi lo problèm formasyon, l’amizman, la kutur. Zot i koné kosa mi vé dir pars mi di sa toultan. Mi éstop tèrla, é la pa zordi nou va arète lo sobatkoz dsi bann késtyon-la.