Koméla nana tout sort kalité la formasyon. I pé mèm dir ou pé aprann lo métyé k’ou vé si ou lé an kapasité. S’pandan, nana in pë zafèr i aprann pa lékol, i aprann pa an kour di soir, napoin lo santr pou sa. Mi vé koz sï inn-dé métyé, k’la pa métyé.

Pourtan, nana in bonpé dmoun i fé sa. Dizon tout demoun sï la tèr sansa prèsk : i komans par èt zanfan, épizapré momon sansa papa, pli tar ankor granpèr sansa granmèr. Ziska zordi, i aprann pa sa pou vréman. I aprann pa èt in bon papa, sinonsa in bon zanfan. I aprann pa non plï èt in bon granpèr, in bon granmèr.

Lédikasyon séksyèl, i fé lékol solman lédikasyon zanfan épi sèt bann paran i fé pa. Alor, koman i fé zordi ? Konm di kréol, i fé konm i gingn. Tazanta i spas bien, tazantan i spas pa bien. Tazantan lé gayar mèm, tazantan lé mol.
Solman, solon moin, in nafèr konmsa, lé si tèlman inportan, dann in sosyété i mérit son nom, I fo amontr kossa i fo fé pou bien viv bann sitiasyon konmsa. Épi néna si tèlman zafèr pou konprann avèk la tèt, épi avèk lo kèr, tèlman zafèr pou aprann, tèlman téknik pou konèt, In lansègnman pou sa sré pa an tro. Sa lé sïr !

Justin