Kossa i lé lansègman « immèrsif » ? Immèrsif-la sa i vien d’lo mo immèrsion - i vé dir wi bingn dodan. Koméla ni pé di lékol néna in lansègnman immèrsif dann la lang fransèz : bann marmaye lékol épi bann amontrèr i bingn dann sète afèr i apèl la lang fransé.. Dizon dann lansègnman la lang fransèz i okipe 90 % é mèm pluss dann l’ansègnman. L’amontraz kréol i roprézante trépé.

Poitan l’amontraz kréol noré pi okip in plass pli inportan dann band klass biling si lété pli zénéralizé, dann l’amontraz la kiltir rényonèz si lété pratiké toulbon. Mé oila tousala i rèss ankor in bonpé dann band tèks de loi é pa vréman dann lo mond lékol : kisoi l’ansègnman, mèm lédikasyon, kissoi l’amontraz.
Astèr, zot i koné lo band loi la fine shanj in bonpé mé la loi-konm èl i lé-lé pa touzour apliké é lé normal dann in péi ankor dann brankar lo kolonyal sansa son pti frèr lo néokolonyal…dopi dé zané i koz de sa, mé si ni konsidèr la mète pliss sinkantan pou aplik la loi 1946- zot i konpran bien la pa d’in kou d’kuiyèr a po i aplik bann nouvèl loi.

Lo 9 moi d’avril la vote in loi dsi lansègnman band lang minoritèr épi réjyonal. In loi inportan pou pèrmète konsèrv so band lang-la, pou dévlop azot, pou anpèsh azot mor sinploman pou déssèrtènn - in pé lé kaziman ménasé disparète konm zot i koné ! Ni pé anparl pli a fon, mé pou zordi ni sava pa pli loin k’in kékshoaz inportan : in nouvo loi i apèl la loi Molac (lo nom in député breton l’amene l’afèr) i pé pèrmète in l’imèrsyon lo mond lékol dann la lang réjyonal, sansa minoritèr.
Sa i vé dir i doi done in pli gran plass la lang réjyonal dann l’amontraz dann lékol : lo mond lékol va gingn bingn dodan a partir. Sa lé vré pou lo kréol rényoné konm pou la kantité lang égziss dann La franss… alor, l’afèr lé fète ! Nou la gagné ! Nou la mète kréol anlèr dann l’amontraz ! Mi pans pa pars lé pa difisil mète in loi an somèye-sirtou avèk in band tète dozèf néna dann gouvèrnman épi dann ladministrasyon - si na poin demoun pou anpèshé. Alor, néna a fèr, néna in shantyé i rouvèr, lès spa li marsh an déor d’lo pèp rényoné pars sansa li va fini an katédral kassé.