Na dé semènn, nou la antèr "Tshao-la rak". Dann mèm tan, konm in drapo pou fète la viktoir, l’avé in kanpagn piblisité pou "nout ronm" vi k’sé li k’i sort vinkèr ! Moin la pa antann in bon pé voi pou koz la-dsi ! Aaakoz ?

Pars lo ronm sé in produi péi ? Byinsir ! Mé la rasine mapou, in méyèr poizon k’lanate, sa in produi péi galman ! Zamal ossi i pouss issi ! I fo ni bate la min pou li ?
Dan la natir, nana tan-é-tan bann plante tyé-kor. I fo nou lé fyèr d’sa ? I fo ni drèss nout drapo "lil d’éksélans" pou sa ?

Mangaye i shante "do ronm de myèl" : i fé ri oté !
Na in pé d’tan, dann salon bal, déssi l’kou d’minui, demoun i torty, lo vèr dan la min, épi té i shante a tue-tète : « lo ronm lé pa bon mèm, lé pa bon mèm, lé pa bon mèm ». La i amiz la !
Défin Madoré, avèk son guitar, dann koin zardin té ki shante : "kan lo ronm lé dann boutèy li bouz pa vréman, mé kan li la rant anndan, li lé pa parèy". Té lo bon tan, pa vré ?

Dann bann fète famiy, lo vèr i bite inn avèk l’ote, sa i fé kliing épi, avan k’i batay, tout i di : "la santé".
Déssi la route, in dalon i marsh, gosh-an-droite, droite-an-gosh ; konm i di, "li kont shomin". Pétète talèr, li tonm atèr, pétète talèr va ramass ali, lo san kayé déssi son guèl.

Alé, a nout bone santé ! Kliing ! "Tshao la rak lé mor" é minm pa in lantèrman promyèr klass ! "Santé !"

Justin