Sort dann Sid pou pran l’avion Gillot, sa sé in annuiman pou dmoun, in traka, in lanspèk, kaziman in tablatir. Kalkil azot mèm : pass par la rout an kornish ou sinonsa par la rout la Plaine, sansa ankor par la rout lé lav... avèk tousa lanboutéyaz nana la zourné. Kant a la nuit, ou i trouv in trafilé loto, lo far déréglé vèy pa koman, koulèr zone, koulèr blan, sansa koulèr mov, i bate lo zié sanm ou, épi lé riskab mète aou dann malizé... Parl pi kan la plui i tonm a tou kassé, la ou lé ankor pli mal aranzé.

Dizon sa lé près fini, akoz ala k’in konpagni la déside mète in lavion rant Sin-ni épi Sin-Pièr, vèrsi-vèrsa... Ala in bon nouvèl pou sak i voiyaz pou alé dan La Frans : ala la fatig an moin, l’annuiman an moin, traka an moin. Kan i fé la kouyonis, i fo dir, mé kan i fé in n’afèr intélizan, i fo dir galman... Donkalor, ala in n’afèr intélizan.
Mé moin, pou mon par, nana in n’afèr la kontant amoin vèy pa koman, sé lo nom banna la done lo lavion : l’apèl sa “Eugène Dayot”. Sa in poèt la gingn la lèpr, épi la vanj kont lésklavaz, épi la pène de mor, azout ankor la ékri gayar-gayar fonnkèr.
Mon rogré sé k’i amontr pa poèt-la dann lékol, mé tardra-viendra, va finir par arivé... an atandan, ni pé mazine dann sièl nana in gayar zoizo an fèr, i vol-vol an l’èr, i fish rant Sin-ni épi Sin-Pièr, i pass déssi Sin-Pol, landroi le poète la viv, landroi li lé antéré. In zoizo an fèr k’i port lo nom in zarboutan nout kultur.

Justin