Sé in ka déspès po amontr marmay lo sans sé koué in résponsabilité.
Zot i devinéra zamé koué moin tapré fé kan moin lamazine sa…
Moin ta po kondui in mobilèt ; zot i koné dé rou ék in motèr. Moin navé permi loto ; mon kod la rout mi koné ; pa bézoin eksplik a moin in léstop, in kliniotan, tourn a gos, a droit, priorité tou sa la mi koné. Moin la pa pas permi moto ; inn ti 50 santimèt kub ; in marmay 14 zan i pas in brévé sékirité routièr ék inn ti manèv dovan in monitèr ; préfé i done in ti permi.

Mi kalkil dann lanbouteyiaz, mé ninport ou sa ; souvan ou na poin priorité, tout fason po out sékirité é po sak lé zot, vodomié minm si ou na rézon, évit in laksidan sin ou giny o maksimome ; sé la ké i ariv la résponsabilité ; oui koné koué ? Sé èt kapab métriz out véikil.
Plizièr zégzanp : oui suiv in fil voitir ; ou lé dérièr ; zot i arèt sak instan ; konyi pa zot dan zot parsok ; ou nora tor ; é somanké oua abime plis out moto ke zot loto !
Ou déboul si in voi grand sirkilasyon ; i fo absoliman arété po ogardé ; ogard biin si out frin avan arièr tou sa i mars biin : sé out résponsabilité !
Avan sèr a gos si ou tourn a gos, agard biin dann rétrovizèr si na poin loto dèrièr toué ; é rétrovizèr la, toué la biin règ ali avann démaré ? Sé out résponsabilité !

Ogard tout : nivo luil, lésans, minm lo révizion tou lé dé mil ou lé dé mil sin san kilomèt…
E mi parl pa ou out sértifika imatrikilasyon (sak i apèl kart griz), di pa sa lé pa inportan ; la sias na gro pans ; talèr bann poulé-la pa sak i manz kouyon-lo bann liniform blé, i apèl zandarm ; toultan lapré kok a ou ék radar ; « vou zavé lé papié di véikil silvouplé ? »
Talèr kab di a toué toué la vol ton motosiklèt ! Sé ton résponsabilité !

 Justin