Médam zé Méssyé, la sossyété, koz èk mwin sé koz èk in kouyon mé sé o pyé d’lo mir k’i oi lo masson.

Mézami,mi koné pa zot, mé pou mwin aprann ékrir té la galère. Pars dann tan lo bann zinstriman pou ékrir lété pa konm koméla : koméla i ékrir avèk stilo-biye, lontan téi ékrir avèk plime, porte-plime épi lank dann son lankriyé. Avèk stilo-biye an prinsipe sa i tash pa épi la pa bézoin rode linpossib in sinp lékritir ron é l’afèr lé fète.

Lo bann zoutiye lontan lété fé éksopré pou fèr lo plin épi lo délyé épi ankor réspèkte bann proporssion si tèlman in bonpé rantre nou l’avé lékritir pate moush,dizon in pé mèg-mèg, avèk bann lète in pé pli déformé ké formé.An pliss zot i koné la métrèss téi pini sak i ékri pa bien, konm èl téi pini ossi sak i koné pa zot lésson, épi konm i di la fash avèk lortograf dopi in boute tan.

In zour la boutik mwin la trouv in plime valab, vèye pa koman.I diré li mèm téi guide aou dann lékritir é a partir d’zour la mwin la èm ékrir.Lo tik-tak d’ékrire té i plé amwin é la métrèss la romarke mwin téi fé sa avèk gou é pinission la éloign in pé. Ziskatan mwin la pass an sizyèm é l’èr-la mwin la foute in tonbé an vélo é dopi zour-la mon min la pi vouli ékoute amwin é lékritir pate moush la rovni pou mon malèr.

Mwin téi panss mon lékritir lété pèrsonalizé mé ziss sa mèm la métrèss téi apèl lékritir pate moush é sa téi bote pa mwin k’i gaskone konmsa mon lékritir. Alé ! Mi kite azot rofléshir la dsi é ni retrouv pli dvan, sipétadyé.