Lindi apré midi, l’avé in l’émisyon dsi Rényon Promyèr avèk konm linvité in roprézantan Parti kominis épi in roprézantan La Frans insoumiz. Moin lété paré pou shanj radyo solman moin la di, pou in foi, sanm pou moin bann z’invité lété intérésan donk dann mon kok loto épi l’anboutéyaz moin la désid ékout lo lémisyon.

Mé ala ké lo lémisyon té i tourn otour d’in brui. Lakèl ? Lo brui prézidan Macron i sava fé roganiz in référandome. Lé inportan in référandome ! Sof ké, d’apré lo brui, sa té i doi tourn otour d’lo nonb dépité épi sénatèr. Brui-la lété tenas mi di azot, sirtou pou lo zournalis téi amenn la pyèss pou lo sobatkoz. Li té i poz késtyon la dsi bann z‘invité, li téi poz késtyon la dsi bann zoditèr k’i téléfone mé vitman, vitman nou la komans par konprann lo brui lété pa asé konsistan pou amenn la pyèss in bon l’émisyon.

Mi vé pa dir demoun l’avé poin arien pou dir dsi lo sizé di zour mé final de kont sa lété in kékshoz k’i intérès pa zot tro pou d’bon. Fransh vérité néna inn-dé gogoz l’avé pans réduir bann zélu lété in n’afèr shok pou dépans moins mé kan la késtyon lété pou konète kosa k’i ansèrvré ? La lété in pé kourt.

Bann z’invité la kant mèm di si i fé in référandome dsi kosa li va porté ? Si li port dsi l’nonm dépité-sénatèr, la késtyon i rèss : mé pou kosa ? Nou la kant mèm antann in l’invité, nout kamarad Ary, dir lo travaye fé lé pli inportan ké lo nonm. Avèk dë député Raymond Vergès épi Lépèrvanche la nyabou fé vote la loi départman fransé la kant mèm mark nout listoir dopi soisant dizan... A sète kosa lé zot la fé ? La pa fé bokou, mèm kaziman pa ditou.

Aprésa la di galman référandome sé in l’arm i koup dë koté : De Gaulle la gouté l’ané 1969 ! La konstitisyon éropéène i doi rapèl in pé in mové souvnir ! In référandome zordi pétète sré la mor lo pétit’om ? Moin la pa dovinèr mé d’apré sak mi konpran sré a pépré sa mèm.

épilog : lo soir mi ékout télé, é mi aprann lé posib lo Macron lé kapab antèr son référandome avan li la véki.. Domaz la pa fé in bon l’émisyon dsi bann késtyon i intérèss anou rényoné avèk demoun plito intérésan plito ké dsi in brui. Sirtou kan lo brui d’apré sak i di : la fé Pschttt !